Posts Tagged ‘Josh Malihabadi’
- In: Hindi Poets | Josh Malihabadi | Josh Malihabadi | Poets | Urdu Poets | Words I Love!
- 2 Comments
Soz e gham De K Mujhe Uss Ne Ye Irshaad Kiya
Ja Tujhe Kash-Ma-Kash-e-Dahar Se Azaad Kiya
Wo Karain Bhi Tou Kin Alfaz Main Tera Shikwa
Jin Ko Teri Nigah-e-Lutf Ne Barbaad Kiya
Dil Ki Choton Ne Kabhi Chain Se Rehnay Na Diya
Jab Chali Sard Hawa Maine Tujhe Yaad Kiya
Aisay Main,Main Teray Tajj Takaluf Pe Nisaar
Phir Tou Farmaye Wafa Aap Ne Irshaad Kiya
Iss Ka Rona Nahi Kyun Tumne Kiya Dil Barbaad
Iss Ka Gham Hain Bohat Dair Main Barbaad Kiya
Itna Masoon Hoon Fitrat se, Kali Jab Chatkhi
Jhuk K Maine Kaha, Mujhse Kuch Irshaad Kiya
Meri Har Saans Hai Iss Baat Ki Shahid e Maut
Maine Har Lutf K Mauqay Pe Tujhe yaad Kiya
Mujhko Tou Hosh Nahi Tumko Khabar Ho Shayad
Log Kehtay Hain K Tumne Mujhe Barbaad Kiya
Wo Tujhe Yaad Karay Jisne Bhulaya Ho Kabhi
Humne Tujh Ko Na Bhulaya Na Kabhi Yaad Kiya
Kuch Nahi Iss K siva Josh Hareefon Ka Kalaam
Vasal Ne Shaad Kiya Hijr Ne Nashaad Kiya
(By Josh Malihabadi)
Ae malihabad ke rangeeN gulistaaN alvidaa
alvidaa aye sarzamiin-e-sub’h-e-KhandaaN alvidaa
alvidaa aye-kishvar-e-she’r-o-shabistaan alvidaa
alvidaa aye jalvagaah-e-husn-e-jaanaN alvida
tere ghar se ek zindaa laash uTh jaane ko hai
aa gale mil leN ki aavaaz-e-jaras aane ko hai
aye malihabad ke rangiiN gulistaaN alvidaa
haai kyaa kyaa nemateN mujhko milii thiiN be-bahaa
yeh khamoshi yeh khule maidaan yeh Thandi hawaa
vaae, ye jaaN bakhsh gustaahai rangiin fizaa
marke bhi inko na bhuulega dil-e-dard aashnaa
mast koyal jab dakan ki vaadiyoN me gaayegi
yeh sub’h ki chhaoN, baguulon ki boh’t yaad aayegii
aye malihabad ke rangiiN gulistaan alvidaa
kal se kaun is baagh ko rangiiN banaane aayega
kaun phooloN ki hansii par muskuraane aayega
kaun is sabze ko sote se jagaane aayega
kaun in paudoN ko siine se lagaane aayega
kaun jaagega qamar ke naaz uThaane ke liye
chaandni raatoN ko zaanuu par sulaane ke liye
aye malihabad ke rangiiN gulistaaN alvidaa
aam ke baaghon meN jab barsaat hogi purkharosh
meri furqat mein lahuu royegi chashm-e-mai-farosh
ras ki buundeN jab uRa dengi gulistaanoN ke hosh
kunj-e-rangiiN mein pukarengi hawayeN Josh Josh
sun ke meraa naam mausam ghamzada ho jayega
ek mahshar sa gulistan mein bapaa ho jayegaa
aye malihabad ke rangii gulistaaN alvidaa
aa gale mil leN Khudaa haafiz gulistaan-e-vatan
aye amaniganj ke maidaan aye jaan-e-vatan
alvidaa ai laalazaar-o-sumbulistaan-e-vatan
assalam aye sohbat-e-rangiin-e-yaaraan-e-vatan
hashr tak rahne na dene tum dakan kii Khaak meN
dafn karna apne shaayar ko vatan ki khaak meN
aye malihabad ke rangiiN gulistaaN alvidaa
Josh Malihabadi
Shafinn's life / Choices 